AI CLASSROOM

唔使喺腦入面摺:兩句 Prompt 起個立體展開圖實驗室

用 Gemini Canvas 製作立體展開圖互動教材,以滑桿探索平面與立體的變化;附兩段 Prompt 和核對方法。

立體展開圖實驗室:Gemini Canvas 3D 摺合互動數學教材

教展開圖最難嘅,係學生要喺腦入面「自己摺」:同一個平面圖,有人一睇就明,有人就好難想像。

今集用 Gemini Canvas 嘗試建立「立體展開圖實驗室」:揀立體、拉滑桿,睇平面點樣摺起;再試吓轉換展開圖。AI 每次生成嘅結果可能唔同,老師要先測試同核對,確認正確先帶入課堂。

▶ 先睇片,再跟住下面步驟做

🧰 今次用咩工具

Gemini Canvas、three.js 開源 3D 函式庫同瀏覽器。示範使用 Gemini 免費版;預留 15–20 分鐘測試及修正,實際時間會因應生成結果而不同。

Step 1:開 Gemini,加入 Canvas

入 gemini.google.com,登入並開新對話,喺輸入框旁嘅新增選單揀「Canvas」。介面如有更新,可以參考 Google Canvas 說明。

Step 2:用第一段 Prompt 起 3D 立體

將以下整段貼入 Canvas:

用 Canvas 製作一個「立體展開圖實驗室」互動教材,繁體中文,適合小四至中一學生,直向手機畫面。
不要自己畫 3D:改用 three.js 開源插件(CDN 引入)。
先做「探索模式」:
① 立體圖形:正方體、長方體、三角柱、四角錐、三角錐(正四面體)、六角柱,按鈕選擇。
② 選一個之後,立體圖形自動「拆開」攤成 2D 平面展開圖(有動畫);下面有滑桿,可以拉回「平面 ↔ 立體」,亦有按鈕「摺埋佢」「展開佢」。
③ 每個面用唔同顏色,摺位沿共用邊轉動;各摺位角度要按該立體真實計算:摺位角度 = 180° − 兩個面之間嘅內二面角(例如正方體 90°、正四面體 109.47°、正六角柱側面之間 60°),不要隨意設定。
④ 顯示面數、邊數、頂點數,以及面嘅組成(例如「1 個正方形 + 4 個三角形」)。
立體可以用手指拖動轉動。外觀清晰、粗黑邊框、紅黑米白配色。

【穩健要求】全部做成單一 HTML 檔:three.js 載入完成(window.onload)先開始畫;renderer 同 canvas 要有明確尺寸(容器高度唔可以係 0);場景一定要有燈光(環境光+方向光)同相機;一開波預設顯示「正方體」,每個面唔同顏色,唔好出現全黑畫面;程式碼唔可以有 JavaScript 錯誤,如果 three.js 載入失敗要顯示提示文字。

【摺合做法】展開圖每個面係一個樞紐(THREE.Group):揀一個面做根,其餘面按「共用邊」排成樹狀結構;子面樞紐位置=共用邊其中一個端點(相對父面),子面幾何=面頂點減去呢個端點。摺合=每個子面沿共用邊旋轉「摺位角度 × t」,所有面朝同一邊摺(−z,遠離鏡頭);計算轉軸方向 d 同「由共用邊指向子面中心嘅垂直向量 n」,如果 (d × n).z 大過 0,旋轉角度取負值。t=1 時,所有面必須剛好圍成封閉立體,每個面向外。

【滑桿】0% = 平面展開圖、100% = 立體,滑桿上嘅文字標籤要同畫面一致。

生成之後,先揀正方體,拉滑桿到 100%,檢查六個面有冇正確接合。再逐一測試其他立體、動畫、按鈕同資料。

Step 3:加「換個展開圖」

繼續喺同一個對話貼第二段:

(接續上一個教材,在原有基礎上加,不要推倒重來。)
加「換個展開圖」按鈕:同一個立體,每次隨機用唔同嘅方式拆開(例如正方體有 11 種展開圖)。
展開圖要由立體本身「沿住邊逐個面攤平」計算出嚟,唔好自己手寫圖案;攤出嚟嘅面唔可以互相疊埋。
保持探索模式 3D 立體正常顯示,唔可以有 JavaScript 錯誤。

正方體共有 11 種不同展開圖,但呢段 Prompt 唔保證 AI 一定產生齊全或全部正確。每次轉換後,都要檢查面有冇重疊,並實際摺合確認。

🔧 常見問題

3D 區全黑? 喺同一個對話輸入:「請檢查 three.js 載入、renderer 同 canvas 尺寸、燈光同相機;預設顯示正方體。如果載入失敗,顯示提示。」

摺完唔成形? 請 AI 檢查共用邊、樞紐位置、旋轉方向同各面的摺合角度,再逐一測試。頂點數正確只係一個初步檢查,唔足以證明所有邊已正確接合。

畫面冇更新? 可以要求 AI 輸出完整 HTML 並覆蓋 Canvas,再重新測試。展開圖重疊,就要求面不重疊並自動縮放置中;按鈕冇反應,就要求檢查事件綁定及 JavaScript 錯誤。

✅ 老師要核對

  • 正方體有 11 種展開圖;每個生成圖都要檢查能否摺合。
  • 四角錐有 1 個正方形同 4 個三角形;三角柱有 2 個三角形同 3 個長方形;六角柱有 2 個六角形同 6 個長方形。
  • 正四面體內二面角約 70.53°,由平面摺起嘅角度約 109.47°。實際圖形規格及所有面、邊、頂點仍須逐一核對。

📲 點樣攞去堂上用

喺 Canvas 使用分享功能複製連結,貼到 Google Classroom 或製作 QR code,並先用學生裝置測試存取。可以先投影正方體,叫學生估面會摺到邊,再拉滑桿檢查;亦可比較不同展開圖,討論點解可以或唔可以摺成正方體。

想學更多 AI 教材製作?瀏覽 BEL AI 老師社群|聯絡我們