文言文默寫最慘唔係唔識解，而係「理解就理解晒，一落筆就寫錯字」——「私讎」寫成「私仇」、「吾兩人」寫成「吾二人」，一隻字就冇咗分。
上集我哋用兩句 Prompt 起咗第一關「時空定位」同第二關「章法重組」。今集再加一句，喺同一個教材上面加第三關「名句默寫」：名句挖空，學生喺字詞庫點字填返，填錯即刻有提示，專捉正字；再加一版收結，完整原文段落、主旨、教育局粵語誦讀、完成印章同評級一次過出晒。
🧰 今次用咩工具
Gemini（Canvas 功能）：喺上集個教材上面加第三關同收結，免費版可用。
上集起好嘅兩關教材（同一個 Gemini 對話）：接住做，唔使由頭起過。未做上集？先跟上集教學，兩句 Prompt 起好第一、二關。
教育局「建議篇章」粵語誦讀錄音（mp3 連結）：嵌入收結頁，學生跟住聽正確讀音，免費。
就係咁多。⏱ 今次得一句 Prompt，等十幾廿秒就起好。
Step 1：開返上集嗰個 Gemini 對話
入 gemini.google.com → 喺對話紀錄開返上集起咗兩關嗰個對話，Canvas 入面仲見到個闖關教材就啱。
Step 2：一句 Prompt 加第三關「名句默寫」＋收結
成句照抄，一隻字唔使改：
（接續上一個有兩關的教材，加入第三關與收結，不要推倒重來。）
【第三關・名句默寫（中文）】將下列名句挖空，學生由詞庫點字填回，填對鎖定變綠、填錯震動 + 提示；留意正字（如「讎」非「仇」）：
「以先國家之（急）而後私（讎）也」、「強秦之所以不敢加兵於趙者，徒以吾（兩人）在也」、「廉頗聞之，（肉袒負荊），因賓客至藺相如門謝罪」。詞庫須含正誤選項。
【收結】三關完成後，完整顯示重組好的段落 + 主旨（顧全大局、知過能改；強秦不敢犯趙全賴將相和），並嵌入教育局粵語誦讀：
<audio controls src="https://www.edb.gov.hk/attachment/tc/curriculum-development/kla/chi-edu/recommended-passages/ks4_08_c.mp3"></audio>
另顯示完成印章與評級（按失誤次數）。原文逐字照排；史實年代地理逐一核對。
等 10 幾秒——第三關出咗：三句名句挖咗空，下面多咗個「字詞庫」。先點詞語，再點返虛線位就填到入去；填啱會鎖定變綠，填錯就彈紅色提示，叫你留意有冇錯別字。全部填晒，撳「查看最終評核」就去到收結頁：重組好嘅原文段落、主旨、教育局粵語誦讀嘅播放器，仲有完成印章同評級。
點解要自己話畀 AI 知挖邊個字？
邊句值得考、邊個字學生最易錯，淨係老師先知。「讎」、「兩人」、「肉袒負荊」全部係默書失分重災區——如果淨係叫 AI「出個默寫關」，佢多數會隨便挖幾個字，未必捉到痛處。所以 Prompt 入面三句名句都由你親手貼，再用括號逐個標明要挖嘅位，AI 就只負責整空格、字詞庫同判對錯。
同上集一樣，尾句有買保險：「原文逐字照排；史實年代地理逐一核對」——收結頁嗰段原文、主旨，同之前兩關嘅史實，都要佢對返清楚，唔准自己改字。
讀音都係同一個道理：唔好叫 AI 自己「讀」，直接嵌教育局現成嘅粵語誦讀，學生聽到嘅就係標準讀法。想換其他範文，照住同一句 Prompt 換名句同錄音連結就得——教育局「建議篇章」網頁有提供誦讀錄音。
🔧 執漏三寶（常見問題）
記住分工：考邊句、挖邊個字、用邊段錄音，由你話事；空格、字詞庫、判對錯、評級，交畀 AI。
📲 點樣攞去堂上用
Canvas 右上角「分享」→ 攞連結 → 貼落 Google Classroom 或者出 QR code。學生開手機瀏覽器就玩到，唔使裝任何 app。
建議玩法：默書前一晚，叫學生自己玩第三關，評級一出就知邊個字仲未穩陣；堂上投影收結頁，播教育局粵語誦讀，全班跟住讀一次，再對返完整段落講主旨。之後畀未攞到最高評級嘅同學重玩，玩到零失誤為止。
🎓 你已經識用 AI 起「默寫關」
名句挖空、字詞庫、正字提示、收結頁、粵語誦讀、評級——全部一句 Prompt。連埋上集兩關，一篇範文由時空、章法到名句三關玩晒，原文由你把關，冇寫過一行 code，免費版做到。其他指定文言經典一樣用得：換咗名句同錄音連結，《出師表》、《六國論》、《岳陽樓記》都起到自己嘅默寫關。
想要呢套完整 Prompt？去 IG @bel_stem 留言「默寫」，我哋 DM 你！