上集整好個中華文化地圖問答遊戲，學生玩得好開心——但係玩到一半，總有人舉手：「老師，淨返個地方都好難喎，唔識點算？」結果唔係亂估一個，就係成個卡住。
今集教你喺同一個遊戲再加三樣嘢：唔識答可以攞提示嘅「50/50 錦囊」、每答一省自動記低重點嘅「分析錦囊卡片」、同一撳清空嘅「重置遊戲」。三句 Prompt、十分鐘，一樣一行 code 都唔使寫，Gemini 免費版做到。
🧰 今次用咩工具
Gemini（Canvas 功能）：喺上集嗰個對話繼續改，免費版可用。上集整好嘅中華文化地圖遊戲：未整？先跟上集教學做好，大約 10 分鐘。⏱ 今集全程 10 分鐘內。
Step 1：加「50/50 錦囊」——唔識答都有路行
成句照抄：
每題彈窗加「50/50 錦囊」掣，每局限用 3 次。按下去掉兩個錯誤選項；用過後答對只加 5 分。頂部顯示剩餘錦囊次數。
等十幾秒——每條題目下面多咗粒紫色「50/50 錦囊」掣，一撳就刪走兩個錯誤答案，淨返兩個揀；頂部仲顯示「錦囊：3」，用一次少一次。
Step 2：加「分析錦囊」——答完一省，自動記低重點
呢句係成個升級版最有用嘅一步，成句照抄：
加「分析錦囊」區（純前端，唔使外接 AI API）。每答完一省加入一張卡：省名＋一句知識。15 省完成後，用本局對錯顯示強項地區、常錯主題、下一步建議。地圖要一直睇到。
等多十幾秒——地圖下面多咗個「分析錦囊卡片」區：每答完一個省份（唔理啱定錯）就解鎖一張卡，寫住省名、所屬地區、主題標籤同一句知識點；答啱標綠色「答對」、答錯標紅色「答錯」。15 省全部完成，頂部仲會生成一份報告：強項地區、需要加強嘅主題、下一步學習建議。
Step 3：加「重置遊戲」——下一個同學可以重新玩過
加咗新功能，記住順手執埋個重置掣：
重置時分數、50/50 錦囊、分析錦囊一併清空。
頂部標題列會多咗粒「重置」掣：一撳分數歸零、錦囊變返 3 次、分析卡片全部清空，下一位同學由頭玩過。
拆解——點解 Step 2 條 Prompt 要咁寫？
條 Prompt 每一舊都有用，抄之餘要識點解，先改得到自己嗰版：
➊「純前端，唔使外接 AI API」＝唔講明，Gemini 有機會想用 AI 即時分析，叫你去申請 API key；講咗，佢就直接用遊戲自己嘅對錯紀錄計，打開就用得。
➋「省名＋一句知識」＝逼 AI 每張卡都濃縮成一句重點，唔會出一大段字，學生睇得入。
➌「用本局對錯顯示強項地區、常錯主題、下一步建議」＝報告係跟住學生自己答題嘅結果出，唔係 AI 作一段通用評語。
➍「地圖要一直睇到」＝加咗卡片區之後，成版會變長；呢句會令 AI 將地圖固定喺畫面（電腦左圖右卡，手機地圖黐喺頂），學生唔使捲上捲落。
🎲 點樣攞去堂上用
Canvas 右上角「分享」→ 攞連結 → 貼落 Google Classroom 或者出 QR code，學生開瀏覽器就玩到。
建議玩法：分組比賽，每組得 3 個錦囊，要自己決定幾時用——答啱照計分，但用咗錦囊只得一半分，學生會自己傾策略。玩完叫每組截圖「分析錦囊」報告交返嚟，你一眼就睇到全班邊個地區最弱，下一堂重點補返。默書前開放連結，學生自己重玩，錯題卡片就係溫習重點。
🔧 執漏四寶（常見問題）
記住分工：你負責講「想點」，佢負責諗「點做」。
🏁 你已經識將遊戲變成溫習工具
由上集嘅「地圖＋題庫」，到今集加埋提示、錯題紀錄同學習報告，一個問答遊戲已經變成可以自己溫書嘅教材，全程冇寫過一行 code，免費版做到。乜科都套用得：歷史朝代問答加錦囊、科學實驗步驟題加錯題卡、英文文法遊戲加學習報告。